STUPANUS Joh. Nicolaus

STUPANUS Joh. Nicolaus

Pontrasino Rhaetus, fil. Nicolai, natus est A. C. 1542. Aetatis annô 15. Basileam delatus, eô successu studiis, Medico inprimis, ibi incubuit, ut A. C. 1569. a celeberrimo medico Theodoro Zuingero Docturae axioma magno cum plausu impetraret. Post quae Logica primo Professio in Academia Basil. illi concredita est, quâ per quadriennium defunctus, Ioh. Hospiniano Organi Professori succesit, A. C. 1575. tandem in cathedra Medica praefato Zuingerô surrogatus, A. C. 1589. Scripsit quam plurima, inter quae eminent Medicina Theorica, edita Basileae in 8. A. C. 1614. Coeterum ex Italico idiomate latine ab ipso versa; Alex. Piccolominei, de Sphaera libri 4. Eiusdem Compend. de Stellis fixis: ut et, liber de magnitudine terrae et aquae. Pandulphi Collenutii Histor. Neap. libri 6. Ioh. Petri Contareni Veneti Histor. de bello Venetis a Selimo II. illato. Nicolai Machiavelli de Principe, una cum scriptis contra Auctorem. Eiusdem Discursus de Rep. Dialogi 10. Historici. Liber de Holometri fabrica et usu, etc. Idem revidit et diligentissime castigavit, opus Mathem. Petri Pitaci Veronensis, Tridentinis Concilii pairibus exhibitum, de vera Solaris atque Lunaris anni quantitate, aliisque rebus ad Calendarii Rom. emendationem pertinentibus. etc. Habetur quoque eius Oratio de vita et obitu Caelii Sec. Curionis, Basileae A. C. 1570. Obiit A. C. 1621. aetatis fere 80. Pater Emanuelis.